香芒糯米卷

近排嘅芒果又甜又大個，最好用嚟整甜品比我兩位為食仔啦!
材料：呂宋芒果一大個、糯米粉150g、花奶30g、糖3-4湯匙、水250ml、芒果香油適量、吉士粉1湯匙(可令糯米皮變黃色)、椰絲適量及油(備用)
做法：將所有材料混合(椰絲除外)，用保鮮紙放於碟上掃上適量油再倒入芒果糊，大火隔水蒸約6-8分鐘，之後有待放涼。芒果切成長條備用，椰絲滿佈工作檯面上，將放涼之芒果粉團倒轉放上椰絲面上，再分成4份，每份粉團放入適量芒果再接合一起，放入雪櫃定型後再切件就食得了!

鮮味蝦醬豬頸肉

呢個餸最啱送飯，惹味又鮮味
材料：新鮮豬頸肉$20左右
醃料：幼滑銀蝦醬2湯匙、蠔油3/4湯匙、糖2茶匙、麻油、薑絲及紅椒各少許，放入雪櫃1小時
做法：煲滾水後大火蒸12分鐘就可以啦!

甜蜜蜜叉燒

為咗想食熱辣辣新鮮出爐叉燒，作為美好媽媽嘅我，係上年12月買咗焗爐開始就一直自家製叉燒比家中三位男仕享用了，常備醬料在家+買嚿靚靚半肥瘦梅頭肉就OK啦!
材料：半肥瘦梅頭肉約$30
醃料：叉燒醬3湯匙、海鮮醬1湯匙、玫瑰露洒1茶匙、麥芽糖1湯匙
做法：先將梅頭肉用醃料醃一天(可以毋需過夜)
預熱焗爐後，用220c度先焗20分鐘，再反轉另一面用200c再焗15-20分鐘，取出掃上麥芽糖多焗5分鐘...叮一聲，熱辣辣嘅甜蜜蜜叉燒出爐啦!
*不過唔好即時切開呀，一來太熱、二來可以等D蜜汁滲係肉入面會好味D架!

第一天學人寫Blog

今日終於作出新嘗試學人寫Blog，傻吓傻吓乜都唔識，仲要搵肥爸爸幫我呢個電腦白痴手開Blog。全因為作為在職媽媽嘅我，想記錄低每天餘下時間為一屋三位大爺整嘅美食同分享吓整嘢食嘅樂趣呀...