中秋節之夜

八月十五中秋節，是日一家人茹素日~牛油粟米、鮮果沙律、再加上濃香芝士焗薯蓉，豐富又美味啊！食飽飽就同兩位少爺到碼頭賞月兼玩燈籠，中秋節最緊要一家開心渡過，人月兩團圓！

迎月日、燒烤夜

中秋前席，最開心就係一班屋企人聚吓、傾吓、食吓...難得一家大細聚埋一齊，千里迢迢來到我哋屋企附近BBQ，高高興興一同渡過中秋迎月夜^ ^

小一的最後決定

雖然今天身體抱恙，但係有件重要事情可以同爸爸共同去處理，一齊為大寶貝豬未來六年作出最後嘅決定~睇見學校為小朋友做出精美嘅post card、充滿熱誠嘅介紹，過程一齊都順利愉快，希望最後結果一樣咁如意吧！

病榻的一天

今天美好媽媽打敗將，全身冒汗、頭痛+微燒呀~繼一屋三男病完後...感冒病菌最後輪到探我了！

人生交叉點

大寶貝豬嘅人生轉捩點終於來臨了！來年已是一個小學生，告別幼稚園生活啦！美好媽媽&爸爸正為此時頭痛，因為始終是大人嘅選擇、小朋友來實踐嘛~親愛嘅大寶貝豬：無論日後有幾咁艱辛，媽媽都會與你一同面對，陪伴你成長啊！

Angel妹妹生日會

兩位公子星期日好少肯出街街，不過今日叔叔嬸嬸幫Angel妹妹攪生日會，所以我哋一家大細都出席去參加啦！夜晚仲會一齊食晚飯預祝做中秋節架^ ^

雪耳蘋果雪梨無花果煲豬

天氣轉變，除咗開始乾燥之外，一早一晚嘅溫差都好大上落。所以家中三位男仕呢個星期都有幾聲咳兼感冒呀，所以係時候煲番個滋潤湯水潤吓喉嚨至得啦！

芝士焗薯蓉配香煎豬扒

今晚晚餐整咗一家大細都鍾意食嘅芝士焗薯蓉，材料簡單而且又香濃美味，有薯仔王之稱嘅美好爸爸超Like呀^ ^！今餐仲要配埋香煎豬扒做主菜，呢個西式晚餐簡單豐富又美味~

鳳梨小小酥

今日整咗兩大盤鳳梨小小酥，一啖一個。三仔爺唔駛15分鐘就清晒一盤(有成40粒架)，要即刻整過第二盤至可以聽日送比弟婦一家咋

豐富的午餐

多謝愛兄 & 愛嫂請我食咗一頓豐富午餐^ ^而且仲送來一袋兩位公子嘅禮物，今個Lunch time真係大滿足囉~

假日飽飽日

每到最期日都會準備定星期一嘅自家製早餐，今日除咗整紙包蛋糕外，仲有就係繼續努力搓飽飽囉！今次整咗少爺仔至愛嘅沙律芝士腸仔飽、芝士蟹柳外，仲加插咗新創作咖喱雞肉飽^ ^不過是日素食日，唔能夠即時試味...唯有試食在明天啦！

紙杯蛋糕

公司有個同事好鍾意食紙杯蛋糕，所以今日就試吓整比兩位美好少爺試吓口味當做下午茶囉！

材料： (6-8個份量) 低筋麵粉                                30 g 粟粉                                        10 g 砂糖                                        40 g 雞蛋                                        3隻 含鹽牛油                                30 g 雲呢拿香油                            少許 正方形牛油紙                        6-8張 muffin杯                                6-8個 做法：   1) 先預熱焗爐170c 2) 將牛油紙鋪在muffin杯內 3) 蛋白與蛋黃分開 4) (蛋白)分3次加入砂糖打起 5) (蛋黃)打至淡黃色再加入蛋白中拌勻 6) 篩入低粉及粟分，輕手拌勻 7) 加入牛油溶液拌勻 8) 加入已鋪牛油紙之杯內，倒至 8 成滿 9) 入焗爐以170度焗25分鐘，焗至面頭金黃色即成

咸酸菜炒肉片

美好爸爸祖藉係潮州人仕，所以美好媽媽間中都會整番個潮州菜式比爸爸試吓， 有時候簡單嘅餸菜最重要係好送飯，呢款啖啖肉又簡單嘅咸酸菜炒肉片送粥送飯都好美味架！

材料：
咸酸菜                     1棵
半肥瘦豬肉             $15

醃料：
生抽                         11/2湯匙
胡椒粉                     少許
雞粉                         1茶匙
麻油                         少許
砂糖                         1/2茶匙
米酒                         1/2茶匙

做法：
1. 先將豬肉洗淨切薄片，用醃料醃20分鐘。
2. 咸酸菜洗淨，將水份瀝乾，切條備用。
3. 燒熱平底鑊放少許油，用中火先將肉片爆香至7成熟，再加入咸酸菜炒至軟身出味，即可上碟。真係簡單放便又好味^ ^

今年第一個冰皮月餅

兩兄弟恨咗食冰皮月餅好耐了，所以美好媽媽放工後就專登買咗四個迷你版冰皮月餅當飯後甜品，滿足吓兩位公子嘅欲望啦！

香煎咸薄罉

禽日一家四口去飲茶，叫咗好多點心，但係就無點到煎薄罉。上個星期有同事話好想整比個仔食，而且咁啱又買咗D靚韭菜，所以美好媽媽就先自家製一次返去再教佢整啦!

材料:

(可以整4大塊)

 

韭菜                                          $3 (約4兩)

蝦米                                          適量

麵粉                                          兩杯(500ml)

水                                              2 1/4 杯(約550ml)

鹽                                              1  1/2 茶匙

胡椒粉                                      少許

做法:

1. 洗將韭菜及蝦米洗淨，瀝乾水份，切粒。

2. 將麵粉、水、鹽、胡椒粉拌匀。

3. 再加入韭菜及蝦米粒拌匀，靜置三十分鐘，備用。

4. 燒熱平底鑊，放少許油，將3湯殼麵漿放入鑊內，用中火煎香後，反轉再煎至兩面金黃，

    取出切成小塊，上碟即可進食啦! 

韭菜鮮肉餡餅

早兩日去街市專登買咗D靚韭菜，留番今日整個皮薄饀靚嘅鮮肉餡餅下午茶比美好爸爸享用！今次又一次食咗4大個都未夠喉，今晚再要煎幾個至得喎!

材料：
(可以做 10個)
 

麵粉                          180g

熱水                          6湯匙
凍水                          3湯匙
韭菜                          170g($2-3) 或 隨個人喜好
免治豬肉                  $15-20 (約160g)
蒜蓉                          1茶匙
 

豬肉醃料：
生抽                          1湯匙
糖                              1/2茶匙
粟粉                          2茶匙
雞粉                          1/2茶匙
紹興酒                      1茶匙
鹽                              酌量
麻油                          少許
胡椒粉                      少許

 

餡料做法：

1. 韭菜洗凈，放入滾水輕輕拖至軟身，即刻撈起。放涼後，榨乾水份，切幼粒，備用。
2. 免治豬肉用醃料拌勻。放入蒜蓉和韭菜粒。順一個方向搞至起膠。放入雪櫃，冷藏 30分鐘，即成餡料。

餡餅做法：

1. 將麵粉過篩後放入大碗中。用熱水6湯匙(約 80C左右)，拌入麵粉中，拌勻成粒狀。
2. 逐一湯匙把凍水拌入麵粉粒中，然後搓至表面不黏手為止。在碗中掃點油，蓋上濕布，讓粉團靜置30分鐘。
3. 在工作檯上，灑點麵粉防黏。把粉團搓至長條型，分成10等份。搓成圓球狀，用手掌輕壓扁，然後用桿子壓成圓餅形。包入韭菜豬肉餡料，收口朝下。
4. 燒熱易潔平底鑊，放適量油。把包好的餡餅平均鋪在鑊中，用慢火把兩面煎至金黃色。加入少許熱滾水，蓋鑊蓋，煮至水收乾為止。再煎至乾身，即可上碟了。

媽媽的新玩具

今日誠邀三位俊男陪美好媽媽Shopping買新玩具，雖然買唔到最愛嘅顏色，但依然好開心呀^ ^