芝士波波

早幾日美好姐姐話整咗芝士波波比對仔女食，但係唔成功，而且仲好失望。而美好媽媽見有一段時間都無整個呢個小食比兩位公子，今日順便整完比姐姐睇吓佢可以有咩改善囉！

材料：（可做20-22個）

鮮奶                  130ml
牛油                  20g
木薯粉              100g
糯米粉              40g
芝士粉              90g可加最多兩款芝士
雞蛋                  1隻
糖                      1茶匙
泡打粉              3/4茶匙

做法：
先將牛奶及牛油煮沸，熄火。隨即放吓入全部木薯粉，快手攪勻至沒有大粉粒，放暖備用。將雞蛋、芝士粉、糖及泡打粉混合後，便可以已放入放暖之木薯粉團內搓勻，放在工作檯上搓至光滑為止，然後分割成相同大少，放上已擺放焗爐紙或不織布焗爐紙之焗盤上。先預熱焗爐200度，放入芝士波波先焗10分鐘至金黃色，再用170度多焗10分鐘就可以出爐了！香噴噴嘅芝士香味係焗嘅時候已經聞到，一出爐就感受到咩叫做外脆內軟嘅口感了～

焗蜂蜜合桃

其實早幾日4月23號時，美好婆婆入咗醫院做換腳骹手術，而家都仲未可以出院，老人家係醫院又悶又無咩可以做，真係不知幾想返屋企，但係都要等醫生覺得適合時至可以簽紙返屋企休息呢？美好婆婆平日最愛吃乾果，所以趁今日有時間整定D香甜鬆脆嘅蜂蜜合桃過兩日拎去氹吓佢先。

材料：
生合桃                     半斤
白砂糖                     5茶匙
碎冰糖                     適量
蜂蜜                         4茶匙
清水                         約4-5湯匙

做法：
先將生合桃出水5分鐘（去除合桃衣嘅苦澀味），盛起後吹乾多餘水份，備用。預熱焗爐180度，先將合桃焗約12分鐘，出爐稍為冷卻。將砂糖及冰糖放入易潔鑊中炒勻，然後加入水份煮成糖水，再把合桃放入糖水中炒勻，最後再加入蜂蜜炒勻，再放入焗爐，用160度焗10分鐘，出爐後要將合桃稍為放涼，蜂蜜合桃就會更香脆美味啦！

7週年嘅426紀念日

今年已經係第7個426紀念日啦！當然與美好爸爸相識嘅日子係呢個數嘅一倍唔止啦！每年嘅呢日，當然係有工唔返休息一天。不過兩位公子要返學架，所以慶祝活動就由放學後開始，不過趁住佢哋返咗學嘅時候，當然點都要整番個蛋糕仔慶祝吓，簡簡單單整咗個黑白木槺布甸蛋糕囉！放學後即刻幫兩位公子變身，之後就出動去佢哋咁大個仔都未去過嘅地方，而美好爸爸就應該最少6年無去過（因為自從有咗大少都無一齊去過了），就係…去唱K。兩兄弟都覺得好新鮮，而我同美好爸爸就有D唔夠喉囉，因為唱得嗰兩粒鐘！唱完立即係同一大廈轉場，轉戰食食食…韓式鐵板燒+自助餐！兩位少爺都係第一次食韓燒咋，不過佢哋有得食、又有得玩，當然係好開心～一家四口都食得好飽呀！食完玩完行咗一陣街就返屋企切蛋糕了，不過真係好飽囉～都係留番第二日做甜品了！
今年又過咗一個開心又簡單嘅紀念日了！雖然唔係咩特別大肆慶祝，但只要見到一家人開開心心，個個身體健康，知足常樂就夠了！

鮮蝦蟹子縲絲粉+香蜜燒春雞

呢個星期無特別買定新鮮餸菜做晚餐，所以晚餐唯有簡簡單單，用咗家中嘅8原有材料嚟做是日精選了！簡單一個西餐組合已經可以好滿足好開心了！

充實嘅星期日

禽日出咗街整整一日，今日當然係留係屋企做吓家務，陪兩位公子做功課同埋整吓嘢食啦！好耐都無搓過麵包了，今日整咗幾種唔同款式，留番聽日比三位俊男做早餐。

新水鞋…2

女人總係鍾意靚嘢，買鞋買衫幾多都唔會嫌多，早兩日至拎咗對新水鞋返屋企，禽日愛嫂幫我訂嘅新水鞋又啱啱到手，哈哈…屋企又多對啤酒杯咁高嘅鞋啦！美好爸爸今次見到又頭都痛埋，因為美好媽媽最鍾意買長Boot，但從來無諗過點收藏，女人總係有理無理買咗先講架啦！嘻嘻…

美好爸爸嘅新寵兒

美好爸爸一向對電器情有獨鍾，特別對相機簡直係愛不釋手，因為攝影就係佢嘅嗜好之一，上星期係沙田睇中咗部新寵，但以佢嘅性格當然無即時扑搥啦！終於等到星期四18號，美好媽媽趁住食Lunch緊餘嘅時間，買咗呢部名師設計而又無咩地方仲有得買嘅白色Body相機返公司，仲要係放工冒住風雨帶佢返屋企送比嗰個想渴望擁有佢好耐嘅人…美好爸爸囉～

媽媽的新水鞋

差不多整個月都是下雨天，家住偏遠地區，上班路途遙遠，返到公司成日腳濕濕好唔舒服，所以決意買對水鞋保護吓雙腳，唔駛又焗又濕變臭臭腳啦！訂咗佢一個星期，今日終於等到啦！放工即刻著住佢返屋企陪我雨中漫步了～

優閒星期日

星期日嘅美好媽媽通常都會留係最舒服嘅屋企，鍾意整咩食就整咩食。今日除咗陪兩位公子玩吓玩具之外，無無聊聊又可以係廚房渡過，先整咗個提子紅莓蛋糕，再整咗個朱古扭紋蛋糕，再接住整咗兩盤香脆牛油曲奇，滿足又開心。

咸豬手兩食

今次嚟個美好新嘗試，近排見到急凍咸豬手又平又大隻，忍唔住買番兩隻係雪櫃以備不時之需。先用肥美咸豬手配青紅蘿蔔粟米煲個靚湯，之後將整隻咸豬手起骨切片，豬骨放回老火湯中繼續餚湯。咸豬手片再配合洋蔥嚟個黑椒咸豬手煲仔菜，一手兩食有湯又有餸。

材料：青/紅蘿蔔            各1支
            粟米                      2支
            蜜棗                      3粒
            南北杏                  適量
            果皮                      1塊

做法：
先將急凍咸豬手解凍，隨後飛水15分鐘，備用。將青紅蘿蔔洗淨切件，果皮用溫水沉軟去囊，南北杏及蜜棗洗淨備用。將所有湯料放入容器中再注入清水，先用中大火滾20-30分鐘出味，再轉中細火煲30分鐘，熄火。飲用前將咸豬手起肉切片，豬骨放回湯煲中再滾30分鐘，老火靚湯連鹽都唔需要落，清潤又好味。

黑椒咸豬手煲

材料： 洋蔥               1個
             咸豬手肉       1隻
             粗粒黑椒        適量

調味：蠔油                1湯匙
            老抽                1湯匙
            砂糖                1茶匙
            雞粉                1茶匙
            水                    3湯匙

做法：
將洋蔥放入煲中炒至軟身，再加入已切片之豬手略炒，繼而加入黑椒炒勻（食得辣可加多少少），最後加入調味料煮10-15分鐘，待醬汁稍為收乾，熄花焗一陣就食得啦～

又有新電器啦！

天氣依然又涼又濕，討厭！今日突然收到愛嫂電話話有優惠券買電器…不過只限今天，好彩多得非常愛錫家人嘅好哥哥，千里迢迢將優惠券攞過來公司附近比我，而我當然唔會浪費愛兄愛嫂嘅一番誠意，即刻揀番把心水靚風扇帶佢返屋企啦！

香荔酥卷

是日初一食素，美好媽媽又有新作品啦！脆卜卜嘅香荔酥卷終於都唔駛一定係素食舖至可以品嘗到了！美好爸爸話超級好味喎…哈哈！

黃金蟹子炒飯

今晚晚餐簡簡單單，用脆卜卜嘅蟹子、蟹柳、鮮蝦再配上煙肉炒香，香噴噴橙黃色嘅黃金蟹子炒飯就完成啦！

粟米薏米水

近日經常天陰有雨濕氣又重，成個人都好攰咁，趁禽晚煲湯剩番1支新鮮粟米，就用佢嚟煲咗粟米薏米糖冬瓜糖水，等一家人清潤吓又可以去吓濕氣！

材料：薏米         50g
            粟米         1支
            糖冬瓜     15-18條
            冰糖         適量

做法：
先將薏米及粟米洗淨（薏米可先浸5-10分鐘再過水），放入3公升清水，用中火煲20分鐘，再加入糖冬瓜煲20分鐘，先試甜度啱唔啱口味，再加入適量冰糖多煲5分鐘，熄火。