焗蜂蜜合桃

其實早幾日4月23號時，美好婆婆入咗醫院做換腳骹手術，而家都仲未可以出院，老人家係醫院又悶又無咩可以做，真係不知幾想返屋企，但係都要等醫生覺得適合時至可以簽紙返屋企休息呢？美好婆婆平日最愛吃乾果，所以趁今日有時間整定D香甜鬆脆嘅蜂蜜合桃過兩日拎去氹吓佢先。

材料：
生合桃                     半斤
白砂糖                     5茶匙
碎冰糖                     適量
蜂蜜                         4茶匙
清水                         約4-5湯匙

做法：
先將生合桃出水5分鐘（去除合桃衣嘅苦澀味），盛起後吹乾多餘水份，備用。預熱焗爐180度，先將合桃焗約12分鐘，出爐稍為冷卻。將砂糖及冰糖放入易潔鑊中炒勻，然後加入水份煮成糖水，再把合桃放入糖水中炒勻，最後再加入蜂蜜炒勻，再放入焗爐，用160度焗10分鐘，出爐後要將合桃稍為放涼，蜂蜜合桃就會更香脆美味啦！