黑色暴雨警告的星期三

整個夜晚都行雷閃電，雷聲響過不停，閃電光到好似無熄燈，好似被狗仔隊用閃光燈照住咁呀！我照常5：30起身，望到電視新聞，黑色暴雨、山泥傾瀉、閃電、大雨公仔全部齊晒，兩位公子又可以休息一天，係屋企玩餐飽。直至9：00左右知道即將改發較低訊息時，美好爸爸就整好一碗愛心即食麵，比我食完至返工～著好晒擋雨準備，準時10：00就出門口返工了。

香甜椰蓉檳

做完免搓麵包麵團，當然又係時候整番D好嘢比美好婆婆嘆吓啦！今日就用咗免搓麵團做咗個椰檳聽日送比婆婆。點知踢完足球返嚟嘅美好爸爸仲以為有得食，Oh...又一次Sorry，呢個又無佢份啦！

椰蓉餡料材料：

椰絲                                 50g
砂糖                                 35g
軟牛油                             15g
蛋                                     15g
 
將以上材料全部攪勻即成，備用 



做法：

1. 準備免搓麵團約360g
2. 將2份麵團拉長拍扁，掃上蛋液，均勻地塗上餡料
3. 由上至下卷至尾，收口向下
4. 由刀切成2等份，但不要切斷
5. 將麵團從內返向上，向下收口
6. 放入麵包模中，蓋上保鮮紙最後發酵約30分鐘
7. 預熱焗爐180度
8. 掃上蛋液，放入中層焗約15-20分鐘至金黃色即可。

芒果瑞士卷

終於成功了！由於美好家中三位俊男非常鍾意食瑞士卷，同埋大熱天時加埋芒果落去雪凍咗涼浸浸嘅感覺真係好唔錯架，不過因為心急過頭，雪得未夠凍就切件，所以切得肉酸咗少少，不過美好只可試食到少少，轉頭已被兩位少爺消滅得一乾二淨了。

 材料: (32×22cm焗盆)

蛋白                                           4隻

蛋黃                                           3隻
砂糖                                           60g
低筋粉                                       65g

牛奶                                           30g
橄欖油                                       35g

忌廉                                           100g

砂糖                                           10g

做法:1. 將低筋粉過篩2次備用 

2. 蛋黃加入20g砂糖打至淺黃色後，加入橄欖油拌勻，再加入牛奶拌勻

3. 分2次加入低筋粉拌勻後備用

4. 蛋白打至起泡，分3次加入餘下的砂糖打至企身

5. 把1/3蛋白霜加入麵糊中拌勻，再把麵糊倒回餘下的蛋白霜中拌勻   

6. 放入已鋪牛油紙的焗盆中掃平 

7. 放入已預熱170℃之焗爐，焗20分鐘 

8. 待稍涼後即撕去牛油紙，再放到另一塊牛油紙上至完全涼透，然後塗上已打發的甜忌廉後捲起  

9. 放入雪櫃30分鐘定形後取出切件，即可。

  

試做免搓麵包

之前搓得咁辛苦，趁住大熱天時試吓呢個免搓方法得唔得先！而且變化又多方便兼慳時間，做出嚟嘅飽飽真係好鬆軟好食，仲可以唔駛流晒大汗搓到手軟喎！真係開心又搵啱方法整好嘢食...Yeah！

材料：

清水                                    450克
快速乾酵母                        1大湯匙
高筋麵粉                            900克
白砂糖                                180克
鹽                                        1 1/2茶匙
奶粉                                    60克
蛋                                        3個
融化牛油                            180克

**溫馨提示

天氣冷時宜用溫水，麵團也可不必冷藏，或放溫暖處發酵到膨脹再冷藏。如果沒有奶粉，就把水和奶粉的總重510克換成牛奶。如果喜歡比較溼潤的口感，可以增加50克水，並且減掉1個蛋或50克奶油。

麵團做法：

1. 將所有材料依序放入大盆子裡，用麵棍攪拌成均勻柔軟的麵團。
2. 蓋好，冷藏2小時或一天，這段時間裡隨時可以拿出來整形（麵團冷藏越耐甜味越淡）

麵包做法：

1. 基本麵團每個約60g。免搓麵團很軟委濕，雪藏過會比較好做，但仍然需要撒點手粉。

2. 將麵團逐一滾圓，然後造型。

3. 排在烤盤上，刷上蛋水。

4. 放在溫暖潮溼處最後發酵20~30分鐘，直到用手輕按覺得非常鬆軟便可

5. 預熱焗爐180℃，把麵包放入中層焗15~18分鐘即成。

再見智慧齒

今日陽光普照，但係美好媽媽嘅心情就有如行雷閃電咁惡劣，皆因今日終於要面對本人最怕同最唔想見嘅人…牙醫先生！約咗差不多成個月，今日終於等到了，因為陪咗我十幾年嘅其中一隻智慧齒蛀咗，唔剝都唔得。其實內心覺得剝完就一了百了，但係一諗起嗰D手術刀聲、電鑽聲…真係打冷鎮。上午11：30前到咗醫生度，個心跳到數唔到1分鐘跳咗幾多吓了，一叫我名真係面都青埋架，瞓上手術床同醫生傾咗幾句後就即時被處決了！先麻醉後、就見醫生攞起手術刀action了，先要鑽走蛀咗嘅部份，切開牙肉再扯吓拔吓…我猛咁右手捉住左手忍住頂住，攪咗成半個鐘終於將隻百厭打橫生嘅智慧齒拔咗出嚟了，成吋咁長，超級大隻呀！成個口腔都充滿血腥味，仲要等醫生幫我縫針，成個過程都用咗差不多45分鐘架，咁就盛惠$1800大元，其實全行佢已經萛好平了。而家塊面又腫又痛，真係咩心情都無晒了！下星期仲要返去拆線，不過諗起日後唔駛食嘢又驚積咗嘢落去隻牙仔度，一勞永逸都應該係件好事。醫生仲寫咗4日假期比我休息，梗係啦！又紅又腫又講唔到嘢點返工呀！不過只可以休息三天～星期六要開工大吉啦！

母親節雪糕蛋糕

兩種感覺盡在一桶面享受到，蛋糕雪糕～呢個母親節蛋糕夠特別啩？最重要係我真係好鍾意囉，又好味又涼快…哈哈！

為美好婆婆煮嘅母親節晚餐

自家醃製咸蛋

近排心血來潮想醃製自家咸蛋，因為美好家庭經常會用咸蛋蒸肉餅、滾節瓜湯同做湯飯，所以美好媽媽把心一橫，買好材料嚟個自家醃製囉！

材料：
玻璃樽                      2公升容量
白雞蛋                      18隻
清水                          1560g
粗鹽                          400g
米酒                          40g

做法：
將清水放入粗鹽煲滾至溶解，放涼。將雞蛋洗淨並抹乾，備用。玻璃樽洗淨抹乾所有水份，將雞蛋輕手放入空樽內排好，然後將已放涼之鹽水放樽內，再加入米酒，閉上樽蓋密封。並在蓋上寫上日期，放於陰涼處最少30天便可試食。

＊＊滾水必須要完全放涼才可入樽
，記緊鹽水必定要將所有雞蛋覆蓋，雞蛋才可均勻吸收到咸味。

香蕉合桃蛋糕

今日又到星期日，最舒服就梗係留係屋企啦！因為禽日已經同三位俊男去咗探婆婆了，抱咗大細少一晚，真係人都散晒。不過今日都整咗兩款唔同Size嘅香蕉合桃蛋糕，杯裝一出爐已經消滅晒了，另外送咗一條磅蛋糕聽日送比美好婆婆食，希望佢老人家鍾意啦！唔係實比嗰兩位英好姐妹食晒架～

材料：
無鹽牛油 （室溫）      100g
砂糖                               90g
低筋麵粉                       120g
泡打粉                           1茶匙
梳打粉                           1/2茶匙
雞蛋 （室溫）              2隻
香蕉油                           1茶匙
熟香蕉                           1隻
生合桃                           適量

做法：
先將合桃洗淨吹乾，備用。將已放軟之牛油加入打糖，用打發器打發至淡黃色忌廉狀，再分次加入雞蛋打至均勻，放入香蕉油混合。將麵粉、泡打粉及梳打粉混合，再分次篩入牛油中。然後將熟香蕉壓爛，拌入麵糊中混合。可將麵糊放入杯中或做成整條磅蛋糕，最後加入合桃到麵糊中，放入已預熱180之焗爐中，杯裝需要焗20-25分鐘，而條裝需焗50分鐘，焗至表面金黃色即可。

＊溫馨提示
香蕉需到最後混合時才壓爛，否則會好容易變黑
而且每個焗爐溫差有所不同，需多留神睇火

香脆杏仁酥條

五一勞動日安坐家中，美好媽媽就繼續係廚房勞動。今次用咗杏仁片同杏仁粒兩種嚟做酥條。出嚟嘅效果有兩種唔同口感架～

材料：
現成酥皮                      2塊
蛋白                              1隻
砂糖                              80g
杏仁片/杏仁碎            50g

做法：
將蛋白及砂糖混合，打發至起泡變為白色 。酥皮從冰箱取出，將蛋白泡沫塗滿整塊酥皮上，再將杏仁灑滿在蛋白泡沫上，然後切成長條狀。放入已預熱180度之焗爐焗約15-18分鐘便完成。

香蕉糕

禽日探完美好婆婆，問佢有咩想食，老人家當然話無所謂，你整咩我食咩囉！今日趁住假期，專登試整咗香蕉糕比佢做甜品～呢個方法材料簡單，做法又容易。

材料：
糕粉                             80g
砂糖                             50g
菜油                             1/2茶匙
香蕉油                         1茶匙
滾水                             120ml
糕粉（灑表面用）      適量

牛油紙或保鮮紙

做法：
將砂糖、菜油及香蕉油混合，加入熱滾水將砂糖溶解，隨即加入糕粉，快手攪拌成為粉團，然後將粉團放上牛油紙或保鮮紙上搓成長條狀，再灑上糕粉，切件完成。

芒果鳥結糖

新年整完一大批鳥結糖後，已經無整一排了。近排美好姐姐成日叫我試整芒果味鳥結糖，所以咪試整吓呢個味道還佢心願囉！

材料：
棉花糖                   150g
奶粉                       80g
牛油                       30g
白朱力                   20g
吉士粉                   1湯匙
芒果乾                   60g
杏仁片                   30g

做法：
將牛油、吉士粉及白朱古力放入易潔鍋中用慢火煮溶，將綿花糖放入溶液內煮至軟身，隨即加入奶粉快手攪勻，熄火。繼而加入乾果混成一團，將所有材料混合後，就可以將綿花糖團放入已預先放上牛油紙之容器上定型，放涼後再放入雪櫃雪至硬身，便可以切件包裝了。