再見智慧齒

今日陽光普照，但係美好媽媽嘅心情就有如行雷閃電咁惡劣，皆因今日終於要面對本人最怕同最唔想見嘅人…牙醫先生！約咗差不多成個月，今日終於等到了，因為陪咗我十幾年嘅其中一隻智慧齒蛀咗，唔剝都唔得。其實內心覺得剝完就一了百了，但係一諗起嗰D手術刀聲、電鑽聲…真係打冷鎮。上午11：30前到咗醫生度，個心跳到數唔到1分鐘跳咗幾多吓了，一叫我名真係面都青埋架，瞓上手術床同醫生傾咗幾句後就即時被處決了！先麻醉後、就見醫生攞起手術刀action了，先要鑽走蛀咗嘅部份，切開牙肉再扯吓拔吓…我猛咁右手捉住左手忍住頂住，攪咗成半個鐘終於將隻百厭打橫生嘅智慧齒拔咗出嚟了，成吋咁長，超級大隻呀！成個口腔都充滿血腥味，仲要等醫生幫我縫針，成個過程都用咗差不多45分鐘架，咁就盛惠$1800大元，其實全行佢已經萛好平了。而家塊面又腫又痛，真係咩心情都無晒了！下星期仲要返去拆線，不過諗起日後唔駛食嘢又驚積咗嘢落去隻牙仔度，一勞永逸都應該係件好事。醫生仲寫咗4日假期比我休息，梗係啦！又紅又腫又講唔到嘢點返工呀！不過只可以休息三天～星期六要開工大吉啦！