大寶貝5歲生日啦!

5年前嘅今日就係我家大寶貝出世嘅日子，多謝謙謙豬帶比美好媽媽很多、很多的第一次!親愛嘅大寶貝豬仔，媽媽I Love U...媽媽永遠愛你!

杞子圓肉桂花糕

美好爸爸對甜品嘅熱愛始終不及美好媽媽，不過唯獨對桂花糕情有獨鍾!但原來唔講唔知，其實好多人都喜歡呢個糕點喎!
材料：桂花3茶匙、杞子及圓肉2茶匙、冰糖150g、魚膠粉50g、水1300ml
做法：先將桂花、杞子及圓肉洗淨，然後用熱水浸軟，隔水備用。煲滾熱水加入冰糖煮溶，轉中火，之後加入桂花、杞子及圓肉煮约1分鐘，再將魚膠粉逐少加入並不停攪拌直至完全溶解，然後蓋上煲蓋，熄火焗10分鐘。最後才再放入容器，待放凉後便可放入雪櫃最少3小時便可享用。
*ps.如果想材料均勻分佈，可在放入雪櫃1 1/2小時或半凝固狀態時攪拌數下，令材料處於浮動狀態繼續冷藏直至凝固。

久違了感覺

自從轉咗公司後，好耐都無感受到客人對我嗰份人情味了!雖然唔係甚麼貴重嘢，但簡單嘅一份心意已令人感到滿足!

三號風球

兩位少爺仔今日又可以放假一天了，因為半夜經已沿掛著三號風球，但朝早醒來依然看見藍天白雲，莫非呢D就係暴風雨嘅前夕嗎?

父親節快樂

今年父親節下午約咗亞囝爺爺及亞囝叔叔一家人飲茶!至於晚餐就嚟個兩兄弟至愛-壽司宴!由於美好媽媽手腳受了傷，今晚順便可以偷懶一天了...

我的大食仔

今日爸爸帶埋兩位少爺嚟接美好媽媽收工，大少爺一個人消滅了一個大人份量嘅叉燒五寶飯

臘腸蒸雞飯(電飯煲版)

好多時放工返到屋企夜咗，又想做出簡單、快捷好味嘅晚餐真係要動吓腦筋，電飯煲...呢餐靠晒你啦!
材料：米2 1/2杯、雞脾肉3件、臘腸及潤腸各1條、蝦亁10隻、薑絲適量
醃料：生抽2湯匙、雞粉2茶匙、砂糖1茶匙、胡椒粉及麻油少許、洒半茶匙。
做法：雞脾肉洗淨吸乾水份切件，用醃料醃20分鐘，薑切絲、蝦乾用熱水浸軟，臘腸及潤腸切片備用。米洗淨落飯煲內，水份要比正常水量少D(因蒸雞會有肉汁流出)，按正常煮飯功能，之後燒熱平底鑊，放入薑絲及雞肉略炒，爆香至7成熟起鑊備用。留意飯煲蒸氣隔，見稍有蒸氣蒸出，便可快手將所有材料放入煲内飯面上，然後關上煲蓋直至飯熟，飯熟後再焗10分鐘為止。熱辣辣嘅臘味蒸雞飯可隨個人喜好再配上煲仔飯醬油一齊食(但個人覺得蒸雞嘅肉汁流入飯裡面已經好好味了。
*記得飯熟後唔好即時打開煲蓋，比D飯收乾一吓雞汁嘅水份呀。

涼拌青瓜

作為家中總廚嘅我(美好媽媽)，不論平日或假日都會為家中三位俊男準備晚餐，當然假日仲要包括早、午及下午茶呀!但天氣開始炎熱，有時煮完餐飯都真係會無咩胃口，所以間中做個涼伴都唔錯!
材料：青瓜2條、鹽適量
醃料：蒜蓉1湯匙、鎮江醋3湯匙、糖及麻油少許(可隨個人喜歡加入辣椒油或XO醬)
做法：先將青瓜洗淨再起囊切件，用刀背將青瓜拍散，再灑上適量鹽花於青爪內等候半小時(鹽份會將青瓜多餘嘅水份迫出嚟)，將青瓜鹽水傾出及瀝乾水份，然後再將所有調味醃料混入青瓜内，最後放入雪櫃雪至凉快(最少放入雪櫃1-2小時即可以食用了

炒薯條

美好爸爸最愛食薯仔，不論任何做法都可以一次過食好多好多。有時簡簡單單原來都已經可以好美味。
材料：薯仔3個、雞粉2茶匙、麻油少許、水1碗
做法：先將薯仔洗淨切條，用清水浸大約半小時(薯仔會越洗越白、仲會冼出過多嘅澱粉質)，之後剩乾所有水份。燒熱平底煎鑊，落1湯匙油並放入薯條煎香，再將雞粉+水放入鑊內，蓋上鑊蓋用煎焗方式直至水份收乾，放入少量麻油再將兩邊煎香即可上碟啦!

木糠布甸

每日食飽飽晚餐，兩隻為食豬仔不知從何時開始養成了食甜品嘅習慣!可能呢D就係遺傳了美好媽媽嘅為食因子啩!又甜又滑嘅木糠布甸簡單得來美味，兩兄弟食到停唔到口呀!
材料：馬莉餅24片、忌廉250ml、煉奶60ml、雲呢拿油1茶匙
做法：先將馬莉餅壓碎備用，然後將忌廉+煉奶+雲呢拿油混合用電動攪拌器打起至7成軟滑，再將餅碎及忌廉逐層放入甜品杯內，餅碎為底層、忌廉第二層，如此類推，每杯做出大約6-7層左右，最後放入雪櫃雪實(大約3個鐘以上)就可以了!
*放入雪櫃時間耐一D比較好，因為太軟身反而唔好食

芝士脆片

"芝士"對我們美好一家嚟講，簡直係不可缺少嘅食物之一，無論蛋糕、零食、小吃...可算是樣樣都啱，所以隨時隨地都會用芝士嚟做食物，原來芝士配春卷皮都已經可以成為好香好美味嘅小食了
材料： 春卷皮、牛油、芝士粉/芝士碎(今次我只用咗芝士粉)
做法： 先將春卷皮放置於室溫，解涷後將牛油塗滿在春卷皮再灑上芝士粉或芝士碎，再將春卷皮切成小三角形(一張分約8小片)。預熱焗爐，用180c焗15-20分鐘或焗至金黃就可以出爐了。
*仲可以隨個人喜歡或口味配搭其他醬汁(如茄汁、墨西哥醬、沙律醬..)等一齊食，又可以創造出另一番風味

親子活動星期六之芝士火腿+芒果春卷

又到唔駛返工嘅星期六啦!一早整完早餐仲去咗圖書館睇咗一陣書偷吓懶添....而家兩位公子大咗，假日整嘢食都要預埋佢哋一份架，可以當係親子活動、又可以享受整嘢食嘅樂趣，總知就係有得食又有得玩啦!
只要用普通春卷皮都可以做出簡單又好味嘅下午茶，大人細路都可以一齊做得到
材料:芝士4-5片、火腿2大片、芒果1-2個、春卷皮1包
做法:春卷皮預先室溫解涷，芝士及火腿切條，芒果切大粒，將材料放入春卷皮上其中一角，再好似包春卷方法一樣向內摺成長卷形，收口位向下放好便完成一條了
先預熱焗爐，用200c焗25分鐘，其間將春卷反轉一次，焗至兩面金黃香脆即可了!

星期六的早餐

毋需返工嘅星期六早上，當然要整番個豐富美味嘅早餐比家中三位大人享用啦！

我家的兩位可愛百厭寶貝豬

美好媽媽雖然每天都要上班工作，但係只要返到家中，見到呢兩位心肝寶貝就咩都會開心番晒囉!

做個精明眼格價專家

一家四口日常家居生活、起居飲食真係要好似廣告咁話：慳得$1蚊得$1蚊架!美好媽媽每日趁住Lunch時間就最愛周圍逛逛搵平野做個精明消費者，不論大小舖頭及超市都係我嘅目標!
平日整甜品及蛋糕經常都會用得著嘅香油，平日係百佳都要賣$17.x，就算係烘焙用品店都要賣$1x啊!但係只要周圍搜索吓，又比我係華潤發掘到好嘢，呢兩支杏仁及常用嘅雲呢拿香油，每支都只係...$6.8 & $6.9咋!真係除咗用一個"抵"字嚟形容外，都唔知再可以點形容了^_^

我家的辣椒小盆栽

未結婚已同美好爸爸一齊種植過辣椒仔(美好媽媽做女時嘅外號)，不過早幾年因為搬家便轉贈給美好婆婆了!
剛過去嘅星期六至重新添置過花泥及花盆，再次種植我最愛嘅辣椒仔呀!當日黃昏才灑上新鮮嘅種子，禽晚放工已經見到種子發芽啦!辣椒呀~辣椒~我祝你快高長大，以後我哋又可以自給自足，唔駛再買辣椒啦!

甜蜜蝴蝶酥

美好媽媽小時候經常陪住媽媽去買餸，好多時總愛一面行一面食零食，不論大小麵包舖或是茶餐廳嘅麵包部，蝴蝶酥就係我從小到大嘅至愛，可能佢嘅樣真係好似一隻蝴蝶啩，最緊要係因為佢甜蜜蜜，食咗會令人好開心^_^
材料：急凍酥皮一塊、牛油、砂糖、蜜糖、牛油紙 準備：將酥皮放置室溫稍為解凍，平放在工作檯上，在酥皮面上塗上牛油並灑上砂糖，然後在酥皮上設定中位線將左右兩邊向內對摺，再塗上牛油及砂糖，之後再重覆以上步驟一次，塗滿材料後將酥皮放回冰格15-20分鐘稍為雪硬，再取出來切件(大約1吋左右)，如果想食牛油味重D，可在每隻蝴蝶表面再塗上牛油及砂糖 做法：先預熱焗爐，再將一件件酥皮平放在牛油紙上再入焗盤(每隻之間要留點距離，因之後會膨脹變大)，用180c先焗一面20分鐘，再反轉另一面焗15分鐘，最後再加上蜜糖焗多5分鐘，一隻隻嘅甜蜜蝴蝶出爐啦! *出爐後唔好咁心急即刻食呀，可以將蝴蝶酥放在放凉架上略為降溫，放涼後會更脆更好味架

簡單午餐

買唔到想買嘅嘢、但食到想食嘅嘢...滿足+開心!

香煎脆魚卷

亞囝婆婆(即是我的媽媽)知道我們這一家很愛吃，所以經常與公公(即是我的爸爸)四出周圍做價格專家，見到又平又抵嘅材料就會一齊大量入貨，所以我家雪櫃經常都是...常滿!這種特大魚扒，就係倆老四出搜尋嘅成果了!
材料：特級大魚扒一塊、煙肉一包或火腿數片
醃料及準備：所有材料解凍，先將魚扒冼淨後吸乾所有水份，再將魚扒剪成長條形狀，用生抽1-2湯匙(視乎魚扒大小)、胡椒粉適量、雞粉1茶匙，放入雪櫃醃最少半小時。片裝煙肉每條1分為2長度備用(大長會過咸)。魚扒醃好後用煙肉或火腿包好代煎。
做法：燒紅平底煎鑊，落少許油(因煙肉會出油)，用中火將魚卷煎熟，將煙肉煎至脆身及收汗水份即可。
*有時候我家三位為食豬仲會用沙律醬伴食，或視乎各人喜好用不同醬汁(黑椒、鰻魚汁、喼汁)亦可，本人覺得煎到金黃香脆已經好好味了!

充滿煙霞而又晴朗的一天

今天的天氣真矛盾!看起來陽光普照的天空，原來四周都是滿佈煙霞，就好像每個人的心情一樣，每分每秒也充滿著不同的變化，喜、怒、哀、樂?今天心情到底是怎樣呢?

細佬豬的課外活動日

今日輪到肥仔細佬到九龍公園參觀嘅課外活動日，媽媽今朝晨早為細豬準備好份量十足嘅芝士餐盒，肥仔一定好開心、好滿足囉!哈哈...

藍莓牛油蛋糕

我家兩隻為食豬同美好媽媽一樣最喜愛食甜嘢，美味嘅藍莓牛油蛋糕就係排名榜其中一位了!
材料：自發粉150g、牛油100g、砂糖100g、雞蛋2隻、雲呢拿香油數滴、藍莓1盒
做法：自發粉先過篩備用，將牛油放置室溫中軟化，然後加入砂糖混合打至滑身，將雞蛋分開注入牛油糊中攪拌，繼而加入雲呢拿香油，再將自發粉分3次加入牛油糊中拌至沒有粉粒，最後加藍莓入麵糊中及糕面作裝飾(亦可加少許藍莓果醬)
做法：預熱焗爐，用180c焗30-40分鐘(因每個焗爐火刀不一)即成!

香煎甜蜜蜜雞膇

好多時候放工返到屋企時間緊迫，想整簡單、好味嘅餸，一定係整家中想備嘅雞莫屬了!
材料：小雞膇8隻、蜜糖3茶匙
醃料：史雲生調味雞汁2茶匙、胡椒粉少許、薑兩片切絲醃15分鐘
做法：燒紅平底易潔鑊，用中火煎香，再加兩湯匙水冚蓋煎焗5-8分鐘，熟透後加入蜜糖炒勻即可上碟!